மதுரையில் மண்டல அளவிலான முதல்வர் கோப்பை போட்டிகள் தொடக்கம்

மதுரை எம்.ஜி.ஆர். விளையாட்டரங்கில் மண்டல அளவிலான முதல்வர் கோப்பை விளையாட்டுப் போட்டிகள் இன்று தொடங்கின. பள்ளி மற்றும் கல்லூரி மாணவ, மாணவிகள் உள்ளிட்ட பல்வேறு பிரிவுகளைச் சேர்ந்த விளையாட்டு வீரர்கள் இதில் பங்கேற்கின்றனர். இப்போட்டிகள் மூலம் திறமையான விளையாட்டு வீரர்களை கண்டறிந்து, அவர்களை அடுத்தகட்ட போட்டிகளுக்கு அழைத்துச் செல்லும் வாய்ப்பு கிடைக்கும்.

முதற்கட்டமாக பள்ளி மாணவர்களுக்கான டென்னிஸ், கடற்கரை கையுந்துப் பந்து மற்றும் மல்லர் கம்பம் உள்ளிட்ட போட்டிகள் நடைபெறுகின்றன. தொடர்ந்து பள்ளி மாணவிகள் மற்றும் கல்லூரி மாணவ, மாணவிகளுக்கான பல்வேறு விளையாட்டுப் போட்டிகளும் நடத்தப்பட உள்ளன. போட்டிகளில் பங்கேற்கும் வீரர்கள் தங்களது திறமைகளை வெளிப்படுத்தி வெற்றி பெற ஆர்வத்துடன் களமிறங்கியுள்ளனர்.

வரும் நாட்களில் சைக்கிளிங், பளுதூக்குதல், ஜிம்னாஸ்டிக்ஸ், வாள்சண்டை, குத்துச்சண்டை, ஜூடோ, வில்வித்தை மற்றும் துப்பாக்கிச் சுடுதல் உள்ளிட்ட பல்வேறு விளையாட்டுகளிலும் போட்டிகள் நடைபெற உள்ளன. மதுரையில் நடைபெறும் இந்த மண்டல அளவிலான போட்டிகள், மாணவர்கள் மற்றும் இளம் விளையாட்டு வீரர்களின் திறமைகளை ஊக்குவிப்பதுடன், அவர்களுக்கு மாநில மற்றும் தேசிய அளவிலான போட்டிகளில் பங்கேற்கும் வாய்ப்பையும் உருவாக்கும் என எதிர்பார்க்கப்படுகிறது.